ການລົງທຶນໃສ່ວຽກງານພັດທະນາຄູ ໂດຍຜ່ານການຮ່ວມມືທີ່ເຂັ້ມແຂງລະຫວ່າງ
ລັດຖະບານອົດສະຕຣາລີ ແລະ ລັດຖະບານລາວ
ອີງຕາມບົດລາຍງານສະບັບໃໝ່ນີ້, ແຜນງານບີຄວາ ແມ່ນແຜນງານການສຶກສາທີ່ສຳຄັນຂອງລັດຖະບານອົດສະຕຣາລີໃນ ສປປ ລາວ, ມີຜົນ ທາງບວກຕໍ່ຄຸນນະພາບການສິດສອນ, ປັບປຸງການຮູ້ໜັງສື ແລະ ເພີ່ມທະວີການເຂົ້າຮ່ວມຂອງນັກຮຽນ.
ນະຄອນຫຼວງວຽງຈັນ, 21 ພະຈິກ 2023 – ບົດສຶກສາຄົ້ນຄວ້າກ່ຽວກັບການລົງທຶນໃສ່ວຽກງານພັດທະນາຄູ ເຊິ່ງສະໜັບສະໜູນໂດຍລັດຖະບານອົດສະຕຣາລີ ເມື່ອບໍ່ດົນມານີ້ໄດ້ເຜີຍໃຫ້ເຫັນວ່າວ່າ ພາຍຫຼັງສາມປີທີ່ໄດ້ນໍາສະເໜີຫຼັກສູດພາສາລາວ ຂັ້ນ ປ.1 ສະບັບປັບປຸງໃໝ່ເຊິ່ງສະໜັບສະໜູນໂດຍລັດຖະບານອົດສະຕຣາລີໂດຍຜ່ານແຜນງານການປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນ ສຳລັບການສຶກສາຂັ້ນພື້ນຖານໃນ ສປປ ລາວ (ບີຄວາ) ຄູສະແດງໃຫ້ເຫັນວ່າມີຄວາມຮູ້ ແລະ ຄວາມໝັ້ນໃຈເພີ່ມຂຶ້ນ ແລະ ນັກຮຽນມີສ່ວນຮ່ວມຢູ່ໃນຫ້ອງຮຽນຫຼາຍຂຶ້ນ ເຊິ່ງຈະນຳໄປສູ່ການປັບປຸງການຮູ້ໜັງສືຂອງນັກຮຽນໃຫ້ດີຂຶ້ນ.
ແຜນງານບີຄວາ ໄລຍະທີ 1 (2015-2022) ໄດ້ພັດທະນາການຝຶກອົບຮົມກ່ຽວກັບການນຳໃຊ້ຫຼັກສູດສະບັບປັບປຸງໃໝ່, ສະໜອງສື່ການຮຽນ-ການສອນ ແລະ ທຶນສະໜັບສະໜູນດ້ານການສຶກສາຢູ່ບັນດາເມືອງເປົ້າໝາຍຂອງແຜນງານ.
"ລັດຖະບານອົດສະຕຣາລີ ແລະ ລັດຖະບານລາວ ມີຄວາມມຸ່ງໝັ້ນໃນການພັດທະນາຄຸນນະພາບການສິດສອນ ແລະ ຜົນການຮຽນຂອງນັກຮຽນລາວທຸກຄົນ, ໂດຍສະເພາະແມ່ນຜູ້ທີ່ດ້ອຍໂອກາດ. ໃນຂະນະ ການແຜ່ລະບາດຂອງພະຍາດໂຄວິດ-19 ໄດ້ສົ່ງຜົນກະທົບຢ່າງຫຼວງຫຼາຍຕໍ່ໂຮງຮຽນ ແລະ ຄູໃນທົ່ວປະເທດ, ຄວາມຮູ້, ທັດສະນະຄະຕິ ແລະ ວິທີການສິດສອນຂອງຄູສອນ ຂັ້ນ ປ. 1 ທີ່ດີຂຶ້ນ ແມ່ນເປັນສິ່ງທີ່ພວກເຮົາຄາດຫວັງວ່າຈະບັນລຸຈາກການນຳໃຊ້ຫຼັກສູດປະຖົມສະບັບປັບປຸງໃໝ່ນີ້" ກ່າວໂດຍ ທ່ານ ຮສ.ປອ ອານຸລົມ ວິໄລພອນ , ຜູ້ອຳນວຍການສະຖາບັນຄົ້ນຄວ້າວິທະຍາສາດການສຶກສາ, ກະຊວງສຶກສາທິການ ແລະ ກິລາ.
ການສຶກສາຄົ້ນຄວ້າຫຼາຍປີ ເຊິ່ງນຳພາໂດຍ ສະພາການຄົ້ນຄວ້າການສຶກສາຂອງອົດສະຕຣາລີ, ໄດ້ເກັບກໍາຂໍ້ມູນໃນປີ 2019, 2021, ແລະ 2022, ເພື່ອປະເມີນຜົນໄດ້ຮັບຂອງການສະຫນັບສະຫນູນຂອງແຜນງານບີຄວາໃນການປັບປຸງຄຸນນະພາບການສິດສອນ ແລະ ການຮູ້ໜັງສືຂອງນັກຮຽນ.
ການສຶກສາຄົ້ນຄວ້ານີ້ສະແດງໃຫ້ເຫັນວ່າຄູເຫັນຄວາມສຳຄັນຂອງການຝຶກອົບຮົມກ່ຽວກັບການນຳໃຊ້ຫຼັກສູດຈາກແຜນງານບີຄວາ, ລວມທັງ ສື່ການຮຽນ-ການສອນຂອງຫຼັກສູດສະບັບປັບປຸງໃໝ່. ເຖິງຢ່າງໃດກໍ່ຕາມ, ຄູໄດ້ຊີ້ໃຫ້ເຫັນເຖິງຄວາມຈຳເປັນໃຫ້ມີການຮຽນຮູ້ດ້ານວິຊາຊີບຢ່າງຮອບດ້ານ ແລະ ຕໍ່ເນື່ອງຫຼາຍຂຶ້ນ.
ທ່ານ ໂພລ ແຄລລີ, ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ໄດ້ກ່າວວ່າ "ຄູຢູ່ໃນ ສປປ ລາວ ເຮັດວຽກຢູ່ໃນສະພາບ ແລະ ເງື່ອນໄຂທີ່ຫຍຸ້ງຍາກ ແລະ ຢູ່ເຂດຫ່າງໄກສອກຫຼີກ. ການນຳເອົາວິທີການສິດສອນແບບໃໝ່ຂອງຫຼັກສູດສະບັບປັບປຸງໃໝ່ເຂົ້າໃນການສິດສອນອາດຈະເປັນສິ່ງທ້າທາຍ. ການສຶກສາຄົ້ນຄວ້ານີ້ໄດ້ຊ່ວຍໃຫ້ພວກເຮົາເຂົ້າໃຈວິທີການໃນການສະໜັບສະໜູນຄູເພື່ອເຮັດໃຫ້ຄູສາມາດຊ່ວຍເຫຼືອໃຫ້ນັກຮຽນມີຜົນການຮຽນທີ່ດີຂຶ້ນ."
ໃນລະຫວ່າງປີ 2019 ຫາ 2021, ການສຶກສາຄົ້ນຄວ້າສະແດງໃຫ້ເຫັນວ່າອັດຕາຂອງນັກຮຽນທີ່ມີຜົນການຮຽນທີ່ດີເດັ່ນໄດ້ເພີ່ມຂຶ້ນຈາກ 12% ເປັນ 21%. ນັກຮຽນແມ່ນມີຄວາມສົນໃຈ ແລະ ມີສ່ວນຮ່ວມໃນໂຮງຮຽນຫຼາຍຂຶ້ນ ເຊິ່່ງເປັນຜົນເນື່ອງມາຈາກຫຼັກສູດໃໝ່ ແລະ ການສະໜັບສະໜູນຂອງແຜນງານບີຄວາ. ຄູສອນກໍ່ເຊັ່ນດຽວກັນ, ການສຶກສາຄົ້ນຄວ້ານີ້ໄດ້ສະແດງໃຫ້ເຫັນວ່ານັກຮຽນຕ້ອງການເວລາ ແລະ ການຊ່ວຍເຫຼືອຫຼາຍຂຶ້ນກວ່າເກົ່າ ເພື່ອບັນລຸລະດັບຄາດໝາຍຂອງການຮູ້ໜັງສືໃນຫຼັກສູດສະບັບປັບປຸງໃໝ່.
"ລັດຖະບານອົດສະຕຣາລີ ມີຄວາມມຸ່ງໝັ້ນໃນການລົງທຶນດ້ານການສຶກສາຢູ່ ສປປ ລາວ. ດັ່ງທີ່ພວກເຮົາຮູ້ແລ້ວວ່າ ການປັບປຸງຜົນການຮຽນຂອງເດັກຍິງ ແລະ ເດັກຊາຍ, ໂດຍສະເພາະຜູ້ທີ່ດ້ອຍໂອກາດ, ຈະມີຜົນດີຕໍ່ການພັດທະນາຂອງປະເທດໃນໄລຍະຍາວ. ພວກເຮົາຕ້ອງໄດ້ສ້າງໝາກຜົນຈາກການມີສ່ວນຮ່ວມຂອງນັກຮຽນຕັ້ງແຕ່ຕົ້ນ ເພື່ອເຮັດໃຫ້ນັກຮຽນຮູ້ຮຽນໄດ້ດີຂຶ້ນ" ທ່ານ ໂພລ ແຄລີ ໄດ້ກ່າວຕື່ມ.
ການສຶກສາຄົ້ນຄວ້າດັ່ງກ່າວນີ້ໄດ້ເຮັດການສໍາຫຼວດຄູ ແລະ ຜູ້ອໍານວຍການ, ການສອບເສັງຄວາມຮູ້ຂອງນັກຮຽນຢູ່ໂຮງຮຽນຈຳນວນ 355 ແຫ່ງ ແລະ ເຮັດກໍລະນີສຶກສາ ໂດຍການສໍາພາດ ແລະ ສັງເກດການຮຽນ-ການສອນຢູ່ໃນ ໂຮງຮຽນ 12 ແຫ່ງ. ຂໍ້ສະເໜີແນະຂອງການສຶກສາຄົ້ນຄວ້ານີ້ປະກອບມີ: ລົງທຶນໃສ່ການພັດທະນາວິຊາຊີບຄູແບບຕໍ່ເນື່ອງ; ສຸມໃສ່ເພີ່ມທະວີການສ້າງທັກສະດ້ານພາສາເວົ້າ ແລະ ການກຽມຄວາມພ້ອມກ່ອນເຂົ້າຮຽນຂອງນັກຮຽນທັງຢູ່ໃນໂຮງຮຽນ ແລະ ຢູ່ເຮືອນຂອງເຂົາເຈົ້າ; ແລະ ເກັບກໍາ ແລະ ນໍາໃຊ້ຂໍ້ມູນກ່ຽວກັບການຮຽນຂອງນັກຮຽນເພື່ອກຳນົດວິທີການແກ້ໄຂຢູ່ໃນຂັ້ນລະບົບ ແລະ ໂຮງຮຽນໃຫ້ຖືກເປົ້າ.
ທ່ານ ຮສ.ປອ ອານຸລົມ ວິໄລພອນ ໄດ້ເນັ້ນຕື່ມວ່າ "ຜົນໄດ້ຮັບຈາກການຄົ້ນຄວ້ານີ້ເຮັດໃຫ້ພວກເຮົາເຂົ້າໃຈເຖິງຈຸດທີ່ພວກເຮົາຄວນເລັງການສະໜັບສະໜູນສະເພາະໃຫ້ແກ່ນັກຮຽນ ແລະ ຄູອາຈານເພື່ອໃຫ້ເໝາະກັບຄວາມຕ້ອງການຂອງເຂົາເຈົ້າ. ພວກເຮົາ ແລະ ລັດຖະບານອົດສະຕຣາລີ ຈະນຳເອົາບັນດາຄໍາແນະນໍາເຫຼົ່ານີ້ໄປພິຈາລະນາ ແລະ ນຳໃຊ້ເຂົ້າໃນການຈັດຕັ້ງປະຕິບັດສແຜນງານບີຄວາ ໄລຍະທີ 2."
