9 ກຸມພາ
ການວາງສະແດງງານ ສິລະປະດີຈິຕອນ ຄັ້ງທຳອິດ ໃນ ສປປ ລາວ
ພະນະທ່ານ ນາງ ເມແກນ ຈອນສ, ເອກອັກຄະລັດຖະທູດ ອົດສະຕຣາລີ ແຫ່ງ ສປປ ລາວ, ພ້ອມດ້ວຍພາກສ່ວນລັດຖະບານ, ເອກອັກຄະລັດຖະທູດ, ຄູ່ຮ່ວມພັດທະນາ ແລະ ອົງການຈັດຕັ້ງທາງສັງຄົມ ໄດ້ເຂົ້າຮ່ວມງານເປີດ ການວາງສະແດງງານ ສິລະປະດີຈິຕອນ ທີ່ມີຊື່ວ່າ Walking through a Songline ທີ່ ແລັບ ເດີ ລາຍນ໌, ນະຄອນຫຼວງວຽງຈັນ.
ງານວາງສະແດງ Walking through a Songline ຈະເປັນການເປີດປະສົບການໃໝ່ ໂດຍການນຳໃຊ້ລະບົບດີຈິຕອນ, ເຊິ່ງງານດັ່ງກ່າວ ເປັນສ່ວນໜຶ່ງທີ່ມາຈາກງານວາງສະແດງລະດັບສາກົນຂອງ ຫໍພິພິດຕະພັນແຫ່ງຊາດອົດສະຕຣາລີ: Tracking the Seven Sisters (ຕາມຮອຍເອື້ອຍນ້ອງທັງເຈັດ). Songlines, ຫຼື ເສັ້ນທາງແຫ່ງຄວາມຝັນ ການຍ່າງຕາມຮອຍ ການສະແດງແສງສີສຽງ (Songline) ຫຼື Dreaming ໄດ້ກາຍເປັນເປັນແຜນທີ່ບັນທຶກເສັ້ນທາງການເດີນທາງໄປທົ່ວດິນແດນ ອົດສະຕຣາລີ ຂອງເຫຼົ່າບັນພະບຸລຸດ ຜູ້ສັນສ້າງດິນແດນ ແລະ ຜູ້ຄົນ.
ການສະແດງແສງສີສຽງ ໃນຫົວຂໍ້ ຕາມຮອຍເຈັດເອື້ອຍນ້ອງ ໄດ້ສະແດງເຖິງ 5 ການສະແດງແສງສີສຽງ First Nations songlines ຂອງ ກຸ່ມຄົນພື້ນເມືອງ ຈາກທະເລຊາຍທາງພາກຕາເວັນຕົກ ແລະ ພາກກາງ ຂອ ງອົດສະຕຣາລີ. ຮູບແຕ້ມ ແລະ ຮູບຖ່າຍ, ວັດຖຸ, ເພງ, ການເຕັ້ນ ແລະ ການປະສົມປະສານສື່ຫຼາຍກວ່າ 300 ຊະນິດ ຖືກນຳໃຊ້ ເພື່ອບັນຍາຍເລື່ອງ ເອື້ອຍນ້ອງທັງເຈັດ ແລະ ການກຳເນີດເປັນທະວີບຂອງພວກເຂົາ ໃນຂະນະທີ່ ພວກເຂົາເດີນທາງຈາກພາກຕາເວັນຕົກໄປພາກຕາເວັນອອກ.
“ຜ່ານງານວາງສະແດງ Walking through a Songline, ກຸ່ມຄົນພື້ນເມືອງ ຂອງ ປະເທດອົດສະຕຣາລີ ໄດ້ແບ່ງປັນຫຼາຍເລື່ອງລາວກັບບັນດາ ທ່ານ, ເພື່ອນບ້ານ, ແລະ ໝູ່ເພື່ອນ ຂອງພວກເຮົາ” ທ່ານທູດ ຈອນສ ກ່າວ. “ຂ້າພະເຈົ້າ ດີໃຈຫຼາຍ ທີ່ໄດ້ນຳເອົາເລື່ອງລາວດັ່ງກ່າວມາວາງສະແດງທີ່ປະເທດລາວໃນປີນີ້, ປີທີ່ ສປປ ລາວ ເປັນ ປະທານອາຊຽນ, ເພື່ອເປັນການສະເຫຼີມສະຫຼອງ 50 ປີ ໃນຖານະ ທີ່ ອົດສະຕຣາລີ ເປັນຄູ່ຮ່ວມເຈລະຈາປະເທດທຳອິດ ຂອງ ອາຊຽນ, ແລະ ວາລະຄົບຮອບ 30 ປີ ຂົວມິດຕະພາບ ແຫ່ງທຳອິດ ອົດສະຕຣາລີ ໄດ້ສະໜັບສະໜູນ ສປປ ລາວ.” ທ່ານທູດ ຈອນສ ກ່າວເພີ່ມຕື່ມ.
Walking through a Songline ຖືກສ້າງຂຶ້ນໂດຍຫໍພິພິຕະພັນແຫ່ງຊາດອົດສະຕາລີ ຮ່ວມກັບ ບໍລິສັດ Mosster Studio. ງານສິລະປະດັ່ງກ່າວ ຍັງສືບຕໍ່ໄດ້ຮັບການສະໜັບສະໜູນຢ່າງຕໍ່ເນື່ອງຈາກ ຜູ້ອາວຸໂສຄົນພື້ນເມືອງ Aboriginal ແລະ ຜູ້ມີຄວາມຮູ້ຂອງເລື່ອງນີ້.
ໃນຂະນະທີ່ຜູ້ເຂົ້າຊົມຍ່າງຜ່ານ ລະບົບແສງສີສຽງດິຈິຕອນທີ່ສະແດງຢູ່ ເຂົາເຈົ້າຈະສຳຜັດໄດ້ເຖິງ ຄວາມເປັນມາຂອງຄວາມຮູ້ ແລະ ສິລະປະພື້ນເມືອງ ອົດສະຕຣາລີ ດັ້ງເດີມ ທີ່ຈະຖືກສື່ສານໂດຍຜ່ານເຕັກໂນໂລຊີໃໝ່. “ງານວາງສະແດງນີ້ຈະສື່ສານກັບ ທ່ານ ຜ່ານຄວາມງົດງາມ ແລະ ພະລັງ. ພ້ອມທັງເປີດໂອກາດໃຫ້ພວກເຮົາໄດ້ການແລກປ່ຽນວັດທະນະທຳຮ່ວມກັນ” ທ່ານທູດ ຈອນສ ກ່າວ.
ງານວາງສະແດງ Walking through a Songline ຈະເປີດໃຫ້ເຂົ້າຊົມໂດຍບໍ່ເສຍຄ່າ, ນັບຕັ້ງແຕ່ວັນເສົາ ທີ 10 ກຸມພາ - ວັນສຸກທີ 1 ມີນາ 2024 ນີ້.
