ສົ່ງເສີມຄວາມເປັນຜູ້ນຳຂອງແມ່ຍິງ - ຄົນຮຸ່ນໃໝ່ 2018
ນະຄອນຫຼວງວຽງຈັນ, 24 ສິງຫາ 2018
ນັກສຶກສາຍິງຈຳນວນ 31 ຄົນ ສຳເລັດການຝຶກອົບຮົມ ເຊິ່ງໃຊ້ເວລາ 5 ອາທິດຕິດຕໍ່ກັນ ໃນຫຼັກສູດກຽມຄວາມພ້ອມ ເພື່ອກ້າວເຂົ້າສູ່ການເຮັດວຽກ ແລະ ຄວາມເປັນຜູ້ນຳ ເຊິ່ງແມ່ນສ່ວນໜຶ່ງຂອງແຜນງານ “ຄວາມເປັນຜູ້ນຳຂອງແມ່ຍິງ - ຄົນ ຮຸ່ນໃໝ່” ຂອງລັດຖະບານອົດສະຕຣາລີ ເພື່ອເສີມສ້າງທັກສະທາງດ້ານອາຊີບ ແລະ ຄວາມຫມັ້ນໃຈໃນການເຮັດວຽກ ໃຫ້ແກ່ແມ່ຍິງ. ການຝຶກອົບຮົມດັ່ງກ່າວນີ້ ໄດ້ເລີ່ມມາຕັ້ງແຕ່ເດືອນ ກໍລະກົດ ຫາ ເດືອນ ສິງຫາ ໂດຍ ມະຫາວິທະຍາໄລ Queensland University of Technology (QUT) ແລະ ສະຖາບັນ ລາວ-ອົດສະຕຣາລີ.
ພິທີສະແດງຄວາມຍິນດີຕໍ່ນັກສຶກສາທັງ 31 ຄົນນີ້ ໄດ້ຈັດຂຶ້ນທີ່ນະຄອນຫຼວງວຽງຈັນ ເປັນກຽດຮ່ວມໃນງານ ໂດຍ ທ່ານ Jean Bernard Carrasco ເອກອັກຄະລັດຖະທູດຜູ້ມີອຳນາດເຕັມຂອງອົດສະຕຣາລີ ປະຈຳ ສປປ ລາວ ພ້ອມດ້ວຍ ທ່ານ ຮສ ປອ ນາງ ສົມຈັນ ບຸນພັນມີ ຮອງອະທິການບໍດີ, ມະຫາວິທະຍາໄລແຫ່ງຊາດ. ໃນພິທີ ທ່ານ ເອກອັກຄະລັດຖະທູດ Carrasco ໄດ້ກ່າວວ່າ: “ການຝຶກອົບຮົມນີ້ແມ່ນພາກສ່ວນໜຶ່ງໃນເປົ້າໝາຍສົ່ງເສີມແມ່ຍິງໄວຫນຸ່ມ ທີ່ມີພອນສະຫວັນ ຈາກຊຸມຊົນທີ່ຢູ່ຫ່າງໄກສອກຫຼີກ ແລະ ດ້ອຍໂອກາດ ເພື່ອສ້າງໂອກາດໃຫ້ພວກເຂົາເຫຼົ່ານັ້ນ ສາມາດ ເຂົ້າເຖິງຄວາມເປັນຜູ້ນໍາ ແລະ ການພັດທະນາອາຊີບ”.
"ການສົ່ງເສີມໃຫ້ແມ່ຍິງເຫຼົ່ານີ້ ມີທັກສະ ກ່ຽວກັບ ຄວາມເປັນຜູ້ນໍາ ແລະ ມີຄວາມຮູ້ທີ່ຈໍາເປັນ ເພື່ອໃຫ້ກຽມພ້ອມ ສຳລັບວຽກງານ, ຈະເຮັດໃຫ້ພວກເຂົາຈະມີຄວາມໝັ້ນໃຈສູງຂຶ້ນ ເຊິ່ງຈະສົ່ງຜົນດີໃຫ້ແກ່ຕະຫຼາດແຮງງານຂອງປະເທດ, ແລະ ການມີສ່ວນຮ່ວມຢ່າງເຕັມສ່ວນຂອງແມ່ຍິງຢູ່ໃນຂົງເຂດວຽກງານທຸກລະດັບ ແມ່ນເປັນສິ່ງສຳຄັນຫຼາຍ ຕໍ່ການພັດທະນາ ເສດຖະກິດຂອງຊາດ.” ທ່ານ ເອກອັກຄະລັດຖະທູດ Carrasco ກ່າວຕື່ມ.
ທ່ານ ນາງ Lou De Castro Myles ຫົວໜ້າ ແລະ ຜູ້ອອກແບບຫຼັກສູກການຝຶກອົບຮົມ ຈາກ QUT ໄດ້ກ່າວວ່າ: ຈຸດສຸມທີ່ສໍາຄັນຂອງຫຼັກສູດນີ້ ແມ່ນການຮັບປະກັນໃຫ້ແມ່ຍິງເຫຼົ່ານີ້ ສາມາດນຳໃຊ້ຄວາມຮູ້ໃຫມ່ຂອງເຂົາເຈົ້າ ໃນການ ປະຕິບັດວຽກງານຕົວຈິງ. ໃນວັນທີ 22 ສິງຫາ 2018 ທີ່ຜ່ານມາ, ມະຫາວິທະຍາໄລ QUT ແລະ ສະຖາບັນ ລາວ-ອົດສະຕຣາລີ ຍັງໄດ້ຈັດງານ Skills Expo ຂຶ້ນທີ່ໂຮງແຮມ ລາວ ພລາຊາ ວຽງຈັນ ເພື່ອເປັນການພົບປະກັນ ລະຫວ່າງ ບັນດາຜູ້ຈ້າງງານ ກັບຜູ້ທີ່ຜ່ານການຝຶກອົບຮົມທີ່ເປັນຜູ້ຍິງຮຸ່ນໃໝ່ນີ້ ເປັນການເປີດໂອກາດໃຫ້ພວກເຂົາ ໄດ້ສາມາດນຳສະເໜີ ໃຫ້ຜູ້ເຂົ້າຮ່ວມງານ ໄດ້ເຫັນຄວາມສາມາດຂອງເຂົາເຈົ້າ ທາງດ້ານການຄິດແບບເປັນລະບົບ, ການຈັດລຽງລໍາດັບ ຄວາມສໍາຄັນຂອງວຽກງານ, ການວາງແຜນ, ການເຮັດວຽກເປັນທີມ ແລະ ການບໍລິຫານຈັດການກັບຄວາມຫຼາກຫຼາຍ, ນະວັດຕະກຳ ແລະ ການເປັນຜູ້ປະກອບການ, ການວາງແຜນອາຊີບ ແລະ ທັກສະການສະເໜີວຽກງານ.
ຜູ້ຍິງທັງ 31 ຄົນນີ້ ມີຄວາມຄາດຫວັງວ່າ ຈະໄດ້ຮັບວຸດທິການສຶກສາຂອງປະເທດອົດສະຕຣາລີ ຈາກການຝຶກອົບຮົມ ດັ່ງກ່າວ ເຊິ່ງຈະເຮັດໃຫ້ພວກເຂົາມີຄວາມໜ້າສົນໃຈຫຼາຍຕໍ່ກັບຜູ້ຈ້າງງານ. ໃບປະກາດຂອງພວກເຂົາ ຈະຖືກຮັບຮອງໂດຍ ໜ່ວຍງານຝຶກອົບຮົມຈາກມະຫາວິທະຍາໄລ QUT, TAFE Queensland.
ນາງ ນາລີ ມານີແສງ, ນັກສຶກສາທຶນ LANS ປະລິນຍາຕີ ສື່ສານມວນຊົນ ຈາກແຂວງຫຼວງພະບາງ, ໄດ້ໃຫ້ສຳພາດວ່າ: “ຂ້ອຍຢາກຂອບໃຈສໍາລັບໂອກາດທີ່ໄດ້ໃຫ້ຂ້ອຍເຂົ້າຮ່ວມການຝຶກອົບຮົມໃນຄັ້ງນີ້, ມັນແມ່ນເວລາ 5 ອາທິດ ທີ່ບໍ່ໄດ້ຢຸດໄດ້ຢ່ອນ ແລະ ຂ້ອຍໄດ້ຮຽນຮູ້ ແນວຄວາມຄິດ ແລະ ຄວາມຮູ້ຕ່າງໆ ທີ່ຂ້ອຍຄິດວ່າ ຈະເຮັດໃຫ້ຂ້ອຍຢູ່ໃນຈຸດທີ່ດີກວ່າ ແລະມີຄຸນສົມບັດຄົບຖ້ວນຕາມທີ່ນາຍຈ້າງຕ້ອງການ".
ມັນແມ່ນການສົນທະນາຂອງບັນດາແມ່ຍິງຜູ້ໜຸ່ມນ້ອຍ ໃນບໍລິບົດ ກ່ຽວກັບ ຄວາມເປັນຜູ້ນຳຂອງຕົນເອງ ແລະ ຂອງທີມງານ. ຕໍ່ກັບຫົວຂໍ້ດັ່ງກ່າວນີ້ ນາງ ມາລີລາວ ດາລໍ, ນັກສຶກສາທຶນ LANS ປະລິນຍາຕີ ວິທະຍາສາດຄອມພິວເຕີ ໄດ້ກ່າວວ່າ: “ການໄດ້ຮຽນຮູ້ທີ່ຈະເຮັດວຽກເປັນທີມ ກໍເຊັ່ນດຽວກັນກັບ ການເປັນຫົວໜ້າທີມ ມັນແມ່ນປະສົບການທີ່ດີທີ່ສຸດສຳລັບນ້ອງ. ຜ່ານການຮຽນໃນຫຼັກສູດນີ້ ໄດ້ເຮັດໃຫ້ນ້ອງມີຄວາມເຂົ້າໃຈດີຂຶ້ນ ກ່ຽວກັບ ການວາງແຜນ, ການຈັດລຽງລໍາດັບ ຄວາມສໍາຄັນຂອງວຽກງານ ແລະ ການບໍລິຫານເວລາ ເຊິ່ງມັນເປັນສິ່ງທີ່ສຳຄັນຫຼາຍ ໃນການເປັນຜູ້ນຳຕໍ່ກັບຕົນເອງ ແລະ ເປັນຜູ້ນຳໃຫ້ກັບຜູ້ອື່ນ ”.
ການຝຶກອົບຮົມນີ້ໄດ້ຖືກຈັດຂຶ້ນເປັນຄັ້ງທີ 2, ລວມທັງປີທີ່ຜ່ານມາ ມີຜູ້ຍິງ 59 ຄົນ ທີ່ໄດ້ຜ່ານການຝຶກອົບຮົມໃນຫຼັກສູດນີ້ ພວກເຂົາເປັນນັກສຶກສາພາຍໃຕ້ ທຶນການສຶກສາ ລາວ-ອົດສະຕຣາລີ ສຳລັບຮຽນພາຍໃນ (Laos-Australia National Scholarships - LANS) ຈົບການສຶກສາລະດັບປະລິນຍາຕີທີ່ມະຫາວິທະຍາໄລແຫ່ງຊາດ. ທຶນດັ່ງກ່າວ ຈະເລີ່ມເປີດ ຮັບສະໝັກ ຕັ້ງແຕ່ ເດືອນ ກັນຍາ ຫາ ເດືອນ ຕຸລາ 2018 ນີ້.
________________________________________________________________________
ສຳລັບຂໍ້ມູນເພີ່ມເຕີມ
ໂທ: +856 21-265 721
Email: [email protected]
ຜູ້ຕິດຕໍ່:
ນ້ຳໃຈທິບ ສຸວັນນະວົງ, ປະຊາສຳພັນ, ສະຖາບັນລາວ-ອົດສະຕຣາລີ
ໂທ: +856 20 5555 5515
Email: [email protected]