ບົດຖະແຫຼງຂ່າວ
ສະຖານທູດອົດສະຕຣາລີ
ນະຄອນຫຼວງວຽງຈັນ
5 ມີນາ 2018
ທ່ານທູດອົດສະຕຣາລີຢ້ຽມຢາມແຂວງສະຫວັນນະເຂດ
ໃນວັນທີ 26-28 ກຸມພາ ທີ່ຜ່ານມາ, ເອກອັກຄະລັດຖະທູດອົດສະຕຣາລີປະຈຳລາວຄົນໃໝ່ ທ່ານ ຈ໋ອງ-ເບີນາດ ຄາຣາສ໌ໂກ, ໄດ້ເດີນທາງໄປຢ້ຽມຢາມແຂວງສະຫວັນນະເຂດ ເຊິ່ງເປັນການເດີນທາງຢ້ຽມຢາມຕ່າງແຂວງຄັ້ງທຳອິດ. ໃນການຢ້ຽມຢາມຄັ້ງນີ້, ທ່ານທູດໄດ້ພົບກັບເຈົ້າແຂວງແຂວງສະຫວັນນະເຂດ, ພະນະທ່ານສັນຕິພາບ ພົມວິຫານ, ເພື່ອສົນທະນາກ່ຽວກັບຄວາມຄືບໜ້າຂອງວຽກງານການພັດທະນາເສດຖະກິດ ແລະ ສັງຄົມຂອງແຂວງສະຫວັນນະເຂດ.
“ແຂວງສະຫວັນນະເຂດແມ່ນແຂວງທີ່ມີຄວາມຄ່ອງໂຕທາງດ້ານການຄ້າຂາຍນັບມື້ນັບສູງຂຶ້ນ ເຊິ່ງມີເສດຖະກິດທີ່ຫຼາກຫຼາຍຂຶ້ນ” ກ່າວໂດຍທ່ານທູດ. “ອົດສະຕຣາລີ ແລະ ແຂວງສະຫວັນນະເຂດມີການເຊື່ອມໂຍງທາງດ້ານທຸລະກິດທີ່ກຳລັງຂະຫຍາຍຕົວ, ເປັນຄູ່ຮ່ວມພັດທະນາທີ່ແໜ້ນແຟ້ນ ແລະ ມີການເຊື່ອມໂຍງລະຫວ່າງບຸກຄົນກັບບຸກຄົນຢ່າງສະໜິດແໜ້ນ”.
ສະຫວັນນະເຂດແມ່ນແຂວງທີ່ມີເນື້ອທີ່ໃຫຍ່ທີ່ສຸດ ແລະ ມີປະຊາກອນຫຼາຍທີ່ສຸດ ໃນ ສປປ ລາວ.
ການລົງທຶນຂອງອົດສະຕຣາລີໃນແຂວງສະຫວັນນະເຂດກວມເອົາຫຼາຍຂະແໜງການ, ນັບຈາກຂະແໜງ ກະສິກຳ ໄປຈົນເຖິງການຜະລິດ ແລະ ແຮ່ທາດ. ທ່ານທູດໄດ້ພົບກັບບັນດາຫົວໜ່ວຍທຸລະກິດທີ່ດຳເນີນການຢູ່ໃນແຂວງສະຫວັນນະເຂດ ແລະ ໄດ້ເຂົ້າຮ່ວມງານລ້ຽງສ້າງເຄືອຂ່າຍໃນແລງວັນທີ 26 ກຸມພາ ທີ່ຈັດໂດຍສະພາການຄ້າອົດສະຕຣາລີ-ລາວ, ເຊິ່ງໃນງານດັ່ງກ່າວກໍໄດ້ໃຫ້ກຽດເຂົ້າຮ່ວມໂດຍພະນະທ່ານສັນຕິພາບ ພົມວິຫານ, ເຈົ້າແຂວງແຂວງສະຫວັນນະເຂດ ແລະ ມີແຂກເຂົ້າຮ່ວມທັງໝົດປະມານ 100 ຄົນ, ລວມທັງສະພາການຄ້າ ແລະ ອຸດສາຫະກຳແຂວງສະຫວັນນະເຂດ.
ທ່ານ ຕີ ຈີ ເຊັງ, ຜູ້ຈັດການທົ່ວໄປ, ໄດ້ພາທ່ານທູດຢ້ຽມຊົມເຂດເສດຖະກິດພິເສດສະຫວັນເຊໂນ ເຊິ່ງທ່ານທູດໄດ້ຮຽນຮູ້ຫຼາຍຂຶ້ນກ່ຽວກັບຜົນສຳເລັດຂອງເຂດເສດຖະກິດ ໃນການດຶງດູດການລົງທຶນ.
ນອກຈາກນັ້ນ ທ່ານທູດຍັງໄດ້ຢ້ຽມຢາມວຽກງານໃນຂະແໜງການສຶກສາທີ່ອົດສະຕຣາລີໃຫ້ການສະໜັບສະໜູນໂດຍຜ່ານແຜນງານການປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນສໍາລັບການສຶກສາຂັ້ນພື້ນຖານ ໃນ ສປປ ລາວ (ແຜນງານບີຄວາ), ເຊິ່ງຮ່ວມມືກັບກະຊວງສຶກສາທິການ ແລະ ກິລາ ຂອງ ສປປ ລາວ ແລະ ສະຫະພາບເອີຣົບ. ແຜນງານດັ່ງກ່າວໃຫ້ການຊ່ວຍເຫຼືອເດັກດ້ອຍໂອກາດ, ລວມທັງເດັກຍິງ ແລະ ເດັກພິການ ເພື່ອໃຫ້ສາມາດເຂົ້າເຖິງການສຶກສາທີ່ມີຄຸນນະພາບ.
ຮ່ວມກັບຮອງເຈົ້າແຂວງແຂວງສະຫວັນນະເຂດ ພະນະທ່ານ ຄຳພູນ ຕຸໄພທູນ ແລະ ທ່ານ ເກດ ພັນລັກ,ຫົວໜ້າກົມສ້າງຄູ, ກະຊວງສຶກ
ສາທິການ ແລະ ກິລາ, ທ່ານທູດໄດ້ຮ່ວມເປັນປະທານໃນພິທີມອບ-ຮັບຫໍພັກ ແລະ ຫ້ອງນ້ຳນັກຮຽນ ໃຫ້ແກ່ວິທະຍາໄລຄູແຂວງສະຫວັນນະເຂດ. ນອກນັ້ນ, ທ່ານຍັງໄດ້ຮ່ວມກັບຄະນະດັ່ງກ່າວເປັນປະທານເປີດໂຄງການກໍ່ສ້າງໂຮງຮຽນປະຖົມຢູ່ແຂວງສະຫວັນນະເຂດ ທີ່ໂຮງຮຽນປະຖົມເທີ້ມນ້ອຍ, ເມືອງພະລານໄຊ. ອົດສະຕຣາລີໃຫ້ທຶນການກໍ່ສ້າງ ແລະ ສ້ອມແປງໂຮງຮຽນຈຳນວນ 69 ແຫ່ງ ໃນແຂວງສະຫວັນນະເຂດ, ເຊິ່ງຄິດເປັນມູນຄ່າຫຼາຍກວ່າ 2 ລ້ານໂດລາອົດສະຕຣາລີ ແລະ ສະໜັບສະໜູນທຶນການສຶກສາໃຫ້ແກ່ນັກຮຽນຄູໃນແຂວງຈຳນວນ 123 ຄົນ ເພື່ອໃຫ້ເປັນຄູໃນເຂດຫ່າງໄກສອກຫຼີກຫຼັງຈາກຮຽນຈົບ.
ທ່ານທູດໄດ້ກ່າວວ່າ “ອົດສະຕຣາລີໄດ້ໃຫ້ການສະໜັບສະໜູນການສຶກສາ ໃນ ສປປ ລາວ ລວມທັງແຂວງສະຫວັນນະເຂດ ເປັນເວລາຍາວນານ. ພວກເຮົາມີເປົ້າໝາຍດຽວກັນໃນການໃຫ້ໂອກາດເດັກນ້ອຍໃຫ້ໄດ້ຮັບການສຶກສາທີ່ດີ – ສຳລັບ ສປປ ລາວ ບໍ່ມີບັນຫາໃດແລ້ວ ທີ່ຈະສຳຄັນໄປກວ່າການພັດທະນາເສດຖະກິດ-ສັງຄົມ.”
ຫຼັງຈາກນັ້ນ, ທ່ານທູດໄດ້ພົບກັບອາສາສະໝັກອົດສະຕຣາລີ ແລະ ນັກສຶກສາທີ່ຮຽນຈົບຈາກປະເທດອົດສະຕຣາລີ ເຊິ່ງເປັນການສະແດງໃຫ້ເຫັນການເຊື່ອມໂຍງລະຫວ່າງບຸກຄົນກັບບຸກຄົນທີ່ແໜ້ນແຟ້ນລະຫວ່າງອົດສະຕຣາລີ ແລະ ສະຫວັນນະເຂດ. ທ່ານທູດໄດ້ໄປຢ້ຽມຢາມສູນຄົ້ນຄວ້າກະສິກຳທ່າສະໂນ ເຊິ່ງມີອາສາສະໝັກອົດສະຕຣາລີເພື່ອການພັດທະນາສາກົນຫຼາຍຄົນໃຫ້ການຊ່ວຍເຫຼືອຊາວນາໃນແຂວງສະຫວັນນະເຂດ ເພື່ອໃຫ້ເຂົາເຈົ້າມີຄວາມເຂົ້າໃຈເພີ່ມຂຶ້ນກ່ຽວກັບຈັດການກັບສັດຕູພືດ ແລະ ພະຍາດຕ່າງໆ ເພື່ອປັບປຸງການເຮັດກະສິກຳໃຫ້ດີຂຶ້ນ.
ທ່ານທູດໄດ້ກ່າວວ່າ ທ່ານຫວັງວ່າຈະໄດ້ກັບໄປຢ້ຽມຢາມແຂວງສະຫວັນນະເຂດອີກ ແລະ ຫວັງວ່າຈະໄດ້ເຫັນສາຍພົວພັນການຄ້າ ແລະ ການລົງທຶນ, ການຮ່ວມມືທາງດ້ານການພັດທະນາ ແລະ ການເຊື່ອມໂຍງລະຫວ່າງບຸກຄົນກັບບຸກຄົນມີຄວາມແໜ້ນແຟ້ນຍິ່ງຂຶ້ນກວ່າເກົ່າ.
ສອບຖາມຂໍ້ມູນເພີ່ມຕື່ມທີ່:
ຄູນຄຳ ດວງພະຈອນ
ສະຖານທູດອົດສະຕຣາລີ
ໂທ: (021) 353 800 ຕໍ່ 125